|
|
NOVAS |
PREMIADA A ACTIVIDADE DA BIBLIOTECA MUNICIPAL DE SOBER NA XVII CAMPAÑA DE ANIMACIÓN Á LECTURA DOS MARÍA MOLINER
A Biblioteca Municipal de Sober e o seu club de lectura Pintor de Castinande veñen de ser premiados na XVII Campaña de Animación á Lectura dos galardóns María Moliner. Con este distintivo recoñécese a intensa actividade levada a cabo ao longo deste ano na Biblioteca soberina mediante o proxecto ‘programa de animación á lectura 2016’.
A Biblioteca soberina recibirá como recoñecemento en forma de premio un lote duns 150 libros.
Na edición deste ano do certame, convocado polo Ministerio de Educación, Cultura e Deporte, a Federación Española de Municipios y Provincias (FEMP) e a Fundación Coca-Cola, presentáronse un total de 605 proxectos dos cales a Comisión de Valoración seleccionou os 300 mellores programas de promoción á lectura, entre os que se atopa o da Biblioteca Municipal de Sober. Na provincia de Lugo tamén foi premiado o traballo da Biblioteca municipal do Saviñao e a de Xermade.
Para a elección tivéronse en conta a claridade e interese do proxecto para a animación lectora, a boa planificación e viabilidade, así como a orixinalidade e a inmersión nas novas tecnoloxías.
Dende a propia Biblioteca do Concello de Sober amosáronse moi satisfeitos e orgullosos deste galardón “que recoñece o noso traballo e as múltiples iniciativas levadas a cabo para fomentar a lectura no noso municipio”.
|
|
|
|
|
|