NOVAS DO CONCELLO

NOVAS O AUDITORIO DE SOBER XA DISPÓN DUN PIANO DE COLA O auditorio do Centro Sociocultural de Sober xa dispón dun Piano de Cola. A adquisición do instrumento era unha vella demanda da Escola Municipal de Música de Sober que con asiduidade realiza importantes concertos de música, principalmente a través das Xuventudes Musicais de España, nas que se integran as Xuventudes Musicais de Sober.   O alcalde soberino, Luis Fernández Guitián, salientou que dende a Escola Municipal de Música de Sober recibiuse con enorme satisfacción esta adquisición por parte do Concello, “que demostra a súa profunda implicación coa musica, un arte que os soberinos e soberinas levan no seu ADN”, sinalou o rexedor.    Guitián apuntou que con este novo instrumento “a programación musical da Escola soberina poderá ser aínda ser superior á que xa se facía. Deste xeito o novo piano empregarase para facer aínda máis completos os recitais e os concertos”. O alcalde aproveitou para recordar que precisamente dende as Xuventudes Musicais “prevén para os próximos meses cinco concertos de gran nivel e nos que o novo piano será o protagonista na maioría dos casos”.   Un modelo moi valorado polos mellores pianistas O novo piano custou un montante total de 24.000 euros financiados polo Concello de Sober, que contou con unha axuda de 6.000 euros da Consellería de Cultura da Xunta de Galicia.   O rexedor soberino precisou que se trata “dun Piano C3X  Yamaha cunha extraordinaria sonoridade e moi valorado polos mellores pianistas. E adáptase perfectamente a todos os estilos: tanto á musica clásica, como o jazz ou a música moderna”.