|
|
NOVAS |
FINALIZAN AS OBRAS DE URBANIZACIÓN DA PRAZA DA IGREXA DE BOLMENTE
O Goberno local do Concello de Sober vén de rematar as obras de urbanización da praza da Igrexa da parroquia de Bolmente.
Os traballos, con cargo á Área de Reabilitación Integral (ARI) de Sober, supuxeron unha inversión próxima duns 30.000 euros, dos que o 40% do montante total foi aportado polo Ministerio de Vivenda e a Consellería de Infraestruturas da Xunta de Galicia e o demais polo Goberno local.
As actuacións consistiron, en concreto, na renovación do pavimento con adoquín de granito e formigón desactivado. Adecuouse tamén unha área verde no entorno do cruceiro.
O alcalde soberino, Luis Fernández Guitián, apuntou que “estas obras supoñen unha importante mellora dun entorno completamente degradado e renovan por completo a imaxe da Igrexa Románica de Bolmente”.
O rexedor apuntou tamén que “o ARI de Sober é o único de Galicia que afecta a todo o territorio dun Concello e leva xa dúas fases”. Guitián recordou que ademais das axudas á rehabilitacion de máis de medio centenar de vivendas supuxo a mellora de entornos urbanos nas parroquias de Doade, Canabal, A Pena de Proendos, Mer, Naz, Rosende, O Campo de Pinol, Outeiro e Bolmente.
Guitián salientou a importancia da execución destas actuacións “que teñen a finalidade de renovar por completo espazos emblemáticos do rural do noso municipio e pretenden mellorar o día a día dos nosos veciños e veciñas”.
|
|
|
|
|
|