|
|
NOVAS |
O CONCELLO DE SOBER FINALIZA AS OBRAS DE MELLORA NA GARDERÍA MUNICIPAL
O Goberno local do Concello de Sober vén de rematar as obras de mellora na Gardería Municipal. O alcalde soberino, Luis Fernández Guitián, salientou a importancia destas obras e apuntou “que as reformas que se levaron a cabo melloraron substancialmente tanto a parte interior como a exterior a gardería e permitirán que os nosos nenos e nenas xoguen nunhas condicións máis cómodas”.
A inversión total das actuacións no edificio ascendeu a 22.600 euros, dos cales, 19.600 euros foron aportados pola Dirección Xeral de Familia, Infancia e Dinamización Demográfica da Consellería de Política Social da Xunta de Galicia dentro do Plan de Axudas á Rede Pública de Escolas Infantís.
Guitián sinalou que, en concreto, as actuacións que se levaron a cabo no Punto de Atención á Infancia Municipal consistiron “na renovación de todas persianas, no acondicionamento da zona de xogos exterior facendo un peche perimetral novo en aluminio de cor e completando de céspede artificial todo ese entorno e ao mesmo tempo tamén adquirimos novo material tanto para os alumnos e alumnas como para os profesores”.
O PAI, un servizo moi demandado
O rexedor soberino recordou que para o Goberno Local de Sober o PAI “é un servizo primordial”. Guitián precisou que conta con 20 prazas para nenos e nenas de 0 a 3 anos e 3 profesoras e salientou que se trata “dun servizo moi demandado, pois dende fai anos esa vintena de prazas están ocupadas na súa totalidade, habendo incluso lista de agarda para poder optar a unha”, concluíu o alcalde.
|
|
|
|
|
|