|
|
NOVAS |
SOBER CONVOCA O I CERTAME DE TALLA EN MADEIRA CON MOTOSERRA, ENMARCADO DENTRO DO PROGRAMA DA XXXVII FEIRA DO VIÑO DE AMANDI
O Concello de Sober vén de convocar a primeira edición do Certame de talla en madeira con motoserra, que se enmarca dentro da extensa programación da XXXVII edición da Feira do Viño de Amandi, que se dará a coñecer no miradoiro da Pena do Castelo o día 4 de marzo.
O alcalde soberino, Luis Fernández Guitián, apuntou que “dende o Concello esforzámonos en cada edición da Feira do Viño de Amandi por crear novas iniciativas que atraian ao maior número de visitantes e dean a coñecer os nosos recursos”. Deste xeito, precisou o rexedor, “pareceunos unha magnífica idea a posta en marcha deste orixinal certame con demostracións dun oficio en vivo”.
Guitián avanzou que os traballos faranse ao aire libre na Praza do Concello entre os días 1 e 7 de abril. “Será condición indispensable que as pezas reflictan algún valor da Ribeira Sacra, relacionado coa viticultura, a paisaxe, ou o turismo, por exemplo”, indicou.
O Concello porá a disposición dos participantes un tronco de madeira de castiñeiro para deseñar as creacións.
Inscrición e premios
Os interesados e interesadas deben formalizar a súa inscrición entre o 20 de febreiro e o 20 de marzo. Poderán facelo no Concello ou a través do correo info@concellodesober.com. No momento de anotarse deberán indicar as necesidades técnicas que teñen para realizar o seu traballo.
O domingo, 9 de abril, daranse a coñecer aos gañadores despois do pregón da Feira. Haberá tres vencedores: o primeiro recibirán un premio en metálico dotado con 300 euros; o segundo, un premio de 100 euros e o terceiro, 50 euros.
Guitián anima a participar neste certame e engade que “o xurado valorará de xeito especial a relación da peza coa Ribeira Sacra e co mundo da viticultura”.
O alcalde soberino avanzou ademais que “todos os participantes poderán ceder as pezas ao Concello para ser expostas de xeito permanente en edificios públicos municipais. No caso contrario, poderán levalas, salvo as tres gañadoras, que serán de propiedade municipal”. As pezas de propiedade municipal poderán prestarse aos autores para exposicións, sempre que así o soliciten.
descargar as bases
|
|
|
|
|
|