NOVAS DO CONCELLO

NOVAS JOSÉ MANUEL LÓPEZ SANTOS SERÁ HOMENAXEADO POLA SÚA ENTREGA E DEDICACIÓN AO CEIP PLURILINGÜE VIRXE DO CARME O Goberno local do Concello de Sober colabora na organización dunha comida coa que os seus compañeiros e compañeiras queren renderlle homenaxe ao ex director do CEIP Plurilingüe Virxe do Carme, José Manuel López Santos.   O xantar será o vindeiro sábado 18 de novembro ás 14:00 horas no pavillón do CEIP Virxe do Carme de Sober.   A recollida de entradas poderase facer na Casa do Concello, na Oficina de Turismo e no Centro Sociocultural. O prezo será de 24 euros para os adultos e de 10 para os nenos (ata 12 anos).   O alcalde de Sober, Luis Fernández Guitián, explica que con esta comida se pretende agradecer e poñer en valor o traballo que José Manuel López levou a cabo durante tantos anos, xeración tras xeración. “Queremos recoñecer a súa entrega e dedicación, polo que agardamos que sexa unha homenaxe multitudinaria na que devolverlle parte do que nos ten dado”.   Subliña que se homenaxea a unha persoa que ademais de dedicar case medio século da súa vida a docencia en Sober tamén foi tenente alcalde da localidade durante unha década e sempre colaborou na organización de múltiples actividades culturais e doutra índole, como a Feira do Viño.