|
|
NOVAS |
O CONCELLO DE SOBER SUMA 25 ADEGAS INSCRITAS PARA A XXXVIII FEIRA DO VIÑO DE AMANDI
O Goberno local do Concello de Sober vén de manter a primeira reunión preparatoria para a XXXVIII Feira do Viño de Amandi que este ano se celebrará, como de costume, o sábado e domingo de Ramos, 24 e 25 de marzo. O equipo de Goberno mantivo unha xuntanza cos adegueiros da subzona de Amandi para perfilar a organización desta edición, na que se prevé que participen 25 bodegas.
Nesta edición a Feira estará dedicada ao Concello veciño de A Pobra do Brollón, mentres que a inauguración oficial correrá a cargo da adega Guímaro en lembranza da súa matriarca Concepción Pérez, falecida recentemente aos 99 anos de idade.
A feira e o seu cartel anunciador presentaranse o 24 de febreiro co inicio do Mes do Amandi que contará con un importante número de actividades, entre elas xornadas técnicas, catas comentadas, música, a presentación dun libro de Ramón Sandoval, e unha xornada de maridaxe na Escola de Hostalería de Rosende en colaboración coa IXP Vacún de Galicia.
Fiel á súa cita con ‘Xantar’
O Concello de Sober deu comezo xa ás accións promocionais para difundir esta cita vitivinícola declarada de Interese Turístico Galego. Así, entre o 31 de xaneiro e o 4 de febreiro a localidade contará cun posto na mostra Xantar de Expourense. En concreto, o domingo día 4 de febreiro a mostra estará dedicada ao Concello de Sober e haberá unha degustación de viño de Amandi.
O prazo para participar no concurso do cartel anunciador da Feira estará aberto ata o 31 de xaneiro.
|
|
|
|
|
|