|
|
NOVAS |
O CONCELLO DE SOBER DÁLLE COR Á LOCALIDADE CON DOUS NOVOS MURAIS
O Concello de Sober conta desde os pasados días cun novo mural na Avenida de Belán, obra da artista local Ana Santiso, gañadora do concurso de carteis da Feira do Viño de Amandi deste ano.
O Goberno local fíxolle dous encargados á artista. Un deles vén de ser rematado e o outro deu comezo xa nun lateral da Oficina de Turismo Municipal, ubicada na Praza do Concello.
Unha vez rematadas ambas as intervencións, o Concello e a artista xa teñen en proxecto novos traballos para seguir enchendo de cor a localidade.
Traballos anteriores
O Goberno local que dirixe o popular Luis Fernández Guitián avanza así no seu obxectivo de mellorar e facer máis atractiva a localidade con traballos pictóricos e murais, polo que anteriormente xa encargou dúas obras máis á artista nativa de Sober Doa Ocampo. Os traballos leváronse a cabo na Praza do Toural e no edificio das piscinas municipais. Ambos evocan elementos característicos de Sober, como son as uvas e as vides.
A maiores o Concello conta con tres obras executadas polo italo-arxentino afincado en Amandi Alejandro Ciurluini. En concreto, Ciurluini levou a cabo pinturas por encargo municipal no pavillón polideportivo, na Casa da Cultura e na Igrexa de Sober.
Estas actuacións súmanse aos dous murais encargados polo Consorcio de Turismo no marco do proxecto ‘un toque de cor na Ribeira Sacra’ situados no depósito municipal de auga de Sansillao e na Praza do Toural.
|
|
|
|
|
|