|
|
NOVAS |
O CONCELLO DE SOBER ENCHE O NADAL DE ACTIVIDADES CULTURAIS PARA TODOS OS PÚBLICOS
O Goberno local do Concello de Sober programa para as datas do Nadal numerosas actividades culturais para todos os públicos co obxectivo de pasar estas datas en familia e con propostas entretidas para todos os días.
Así, esta semana estase a celebrar un obradoiro para adultos de deseño de postais, ao tempo que segue aberto o prazo para anotarse nos certames de poesía, postais e beléns convocados polo Concello de Sober. O prazo estenderase ata o 21 de decembro.
O 21 de decembro levarase a cabo ás 12:00 do mediodía o Festival Escolar de Nadal no que participa o alumnado do PAI de Sober e o do CEIP Virxe do Carme. Xa pola tarde, a partir das 18:00 horas, terá lugar no Centro Sociocultural o Festival Solidario de Nadal protagonizado pola Escola Municipal de Música de Sober.
Moita música
O día 22 de decembro as Xuventudes Musicais de Sober achegan á localidade un concerto de saxofón e piano. Ás 18:30 horas no Centro Sociocultural. O 23 ás 19:00 horas, concerto Lucus Ensemble cunha agrupación musical de vento e corda patrocinado pola Deputación de Lugo.
Dous días de Festa Infantil de Nadal
Os días 27 e 28 de decembro haberá festas infantís de Nadal con música, inchables e obradoiros. No Pavillón do CEIP Virxe do Carme a partir das 16:30 horas.
Visita dos Reis
O sábado día 5 de xaneiro os Reis Magos visitan Sober para agasallar aos nenos e nenas. No Centro Sociocultural a partir das 12:00 horas.
Merendas con contos no Nadal
Tamén as Merendas con Contos se somerxen no Nadal cunha programación especial para estas datas. O 14 de decembro exposición de ‘El deseo del gato Klops’ e obradoiro coa ilustradora Estefanía Padulles a partir das 18:00 horas. Os días 21 e 26 de decembro desenvolverase un Nadal de cine a partir das 16:30 horas. O día 2 de xaneiro entregaranse os premios dos certames de Nadal e haberá panxoliñas co grupo ‘O Trícole’ a partir das 17:30 horas.
|
|
|
|
|
|