As ‘Merendas con contos’ organizadas pola Biblioteca Municipal do Concello de Sober para os próximos tres venres estarán dedicadas ao Entroido. Mañá, venres 18 de xaneiro, os nenos e nenas coñecerán e aprenderán a elaborar compadres e comadres ao xeito tradicional de Sober. As veciñas da parroquia soberina de Anllo, Ana Mari e Aurelia, serán as encargadas de ensinarlle a todos os participantes a facer bonecos con palla.
 
Os compadres e comadres nacidos da tarde de mañá van ser queimados o xoves 31 de xaneiro (Xoves de Compadres) e o 7 de febreiro (Xoves de Comadres), tal e como marca a tradición do Concello de Sober, nomeadamente na parroquia de Anllo e nos lugares de Matamá e Arxemil. A actividade consiste en facer os compadres e comadres con palla e roupa de homes e mulleres “collida prestada” dos tendais, nun xogo entre homes e mulleres que se remonta moitos anos atrás.
 
Venres, 25 de xaneiro
O venres 25 de xaneiro as ‘Merendas con contos’ centraranse en coñecer o Entroido da comarca, concretamente o de Salcedo. O integrante da Asociación de veciños de Salcedo, Felipe Castro López, visitará a Biblioteca Municipal de Sober para falar dun entroido moi particular e participativo que é o que fan os veciños da Pobra de Brollón e que consiste na saída do oso cos seus criados.
 
Venres, 1 de febreiro
Por último, o venres 1 de febreiro lavarase a cabo o obradoiro de máscaras a partir dos textos Animalotes, un libro de máscaras, de Pepe Carreiro e O Entroido, do colectivo Ollo de sapo.