Unha das feiras máis madrugadoras de Ribeira Sacra, onde cada ano danse cita os adegueiros de Amandi   a fin de semana do Domingo de Ramos para dar a probar os seus caldos.

Declarada de Interese Turístico de Galicia no ano 2000, a feira  reúne a milleiros de persoas poñendo de relevo a importancia da actividade vitivinícola na zona, así como o impulso e o prestixio dun viño que, segundo contan as lendas era levado á Roma dos césares e cultivábase desde os tempos en que se asentaron as ordes monásticas na Ribeira Sacra, en terrazas polas fortes pendentes das ladeiras dos canóns do Sil. Unha orografía que dificulta moito o traballo nas vides, razón pola que esta viticultura é chamada “heroica”.

No ano 1980 celebrouse un domingo de Ramos por inicitativa un grupo de veciños para revitalizar a feira de gando e para sumar atractivo a esta feira invitaron a algún colleiteiro  da zona de Amandi para que levasen unha mostra dos seus caldos.

Foi tal o éxito acadado nesta feira que o viño pasou a ser o protagonista ó ano seguinte tamén no domingo de Ramos, nacendo así unha cita e festividade que fixo que ata os adegueiros máis pesimistas comezasen a creer nun proxecto que hoxe é motor económico da zona.

O recinto feiral, na Praza do Concello, énchese da música da Banda de Música de Sober, unha das máis antigas de Galicia, e un dos símbolos da localidade, para amenizar este gran encontro arredor do viño de Amandi (subzona da D.O. Ribeira Sacra). A cita serve, ademais, como escusa para mostrar a contorna da zona e o seu modo de vida, centrado na viticultura pero tamén na olería, coa veciña parroquia de Gundivós como produtora. Un achegamento aos postos de artesanía na feira bastará para comprobar a relevancia que teñen as pezas desta antiquísima olería pola súa utilidade nas labores viticultoras.

Os adegueiros de Amandi dan a probar aquí o seu viño mencía, abanderado dos tintos galegos, e os visitantes teñen a oportunidade de catalos xunto con outros excelentes produtos, tamén á venda, como queixos e pan, mel da Ribeira Sacra e as roscas de doce de Millán, estes últimos moi apreciados pola súa calidade.