O Concello de Sober  é un dos territorios galegos máis lonxevos incluso chegando a formar parte de investigación da Fundación Matrix para identificar os factores sociambientais que poden influir na calidade de vida das persoas con idade avanzada. A hipótese de que o entorno rural no que nos encontramos é un factor determinante para favorecer a lonxevidade en boas condicións está máis que aceptada.

Constatouse que as labouras agrícolas axudan como fonte de motivación, sendo o traballo na terra o que mantén activos ós maiores, xerando en eles satisfacción coa actividade e co resultado da mesma, ademáis de obter productos saudables.

A sociabilización é outro pilar fundamental para unha boa saúde mental e dende o concello fanse diferentes programas neste senso.

Corría o ano 2000 cando dende o departamento de Servizos Sociais se pensou en facer unha merenda como día de reunión e de festa para os maiores que formaban parte do programa de servizos sociais.

Esta primeira merenda constaba duns aperitivos coma empanadas e embutidos e un biscoito mollado con chocolate quente, que era servido por todo o persoal do Concello no comedor escolar. Xa neses primeiros encontros a música era parte da festa, e había un baile de celebración como é tradición en Galicia.

Despois do éxito acadado nesa primeira merendola a festa foi sufrindo diversas modificacións e xa uns dez anos máis tarde se fai un formato máis semellante ao actual contratando unha empresa que se encarga de preparar un xantar e non unha merenda para todos os maiores.

Dende esa primeira edición na que a merenda era para os usuarios do servizo que se prestaba dende o concello actualmente poden asistir tódolos maiores do concello e os familiares que o desexen.

A Festa dos Avós vense celebrando a finais de Maio ou en Abril dependendo do ano.

Na actualidade comeza cunha misa, esta dá paso a unha comida popular con música en directo, sorteo de agasallos así coma recoñecemento especial ás persoas máis lonxevas do concello presentes.

O Pavillón do C.E.I.P. Virxe do Carme de Sober é a localización na que se celebra esta festa, poñendo un servizo de autobuses especial para achegarse ata alí.