Na parroquia de Pinol, a medio quilómetro da igrexa de San Vicente, nunha excepcional paraxe natural, lindante co Canón do Sil está o Santuario da Virxe de Cadeiras. Foi construído no século XVIII, quedando a obra inacabada. O edificio dunha soa nave, é de pedra granítica e sillería ben labrada. Máis que polo interese arquitectónico, destaca por ser un lugar de peregrinación, debido aos milagres que a tradición atribúe á Virxe de Cadeiras.

Segundo conta a lenda  (da Idade Media) apareceu milagrosamente unha imaxe da Virxe nun oco entre uns penedos moi preto de onde agora está a Santuario. Alí se levantou una pequeña ermida que se reconstruíu en diferentes ocasións antes da construcción do actual santuario que acollía aos visitantes que se achegaban ás Romarías ou outras celebracións relixosas.

Podemos atopar bibliografía adicada a este santuario, tanto a nivel arquitectónico coma a súa evolución ou información escrita sobre os milagres atribuídos a Virxe.

Neste lugar celébrase, dende o século pasado, os días 7,8 e 9 de setembro, unha romaría popular adicada a esta singular advocación mariana. Oficios relixiosos, procesión e comida campestre son os protagonistas desta romaría.