NOVAS DO CONCELLO

NOVAS O CONCELLO DE SOBER ACOMETE OBRAS DE REXENERACIÓN DE CAMIÑOS CON MÁIS DE 400.000 EUROS DE INVERSIÓN O Concello de Sober está levando a cabo un importante plan de mellora de camiños con máis de 400.000 euros de inversión. As actuacións están financiadas con fondos propios municipais e coa colaboración doutras administracións e chegarán á práctica totalidade das parroquias .   En concreto, nas últimas semanas finalizaron os traballos do Plan Marco de camiños 2017-2018 cunha inversión de 85.000 euros dos que a Consellería de Medio Rural aportou 70.000 euros e o Concello os 15.000 restantes. Este plan incluía o acondicionamento dos accesos desde Santa Marta (Barantes) por O Taro ata Suairexa en Figueiroá, o remate da estrada entre O Cadaval e Mourentán en Doade, a estrada que comunica Casar de Cima co Cruceiro en Lobios e o aglomerado da estrada dende Sistín do Mato a Canaval.   Por outro lado, acaba de saír a licitación o Plan Marco 2018-2019, dotado tamén con 85.000 euros de orzamento. Neste caso as actuacións inclúen a renovación do camiño que vai dende Villoriz (Bolmente) por O Taro e Camilo ata Arxemil en San Martiño de Anllo, a mellora da estrada dende Naz por Fondo de Vila ata a Lama dos Campos (Rosende) e o aglomerado dos accesos a Outeiro (Proendos) dende a estrada Sober-Doade e a estrada que comunica Francos e Sansillao dende a estrada Sober-Arxemil.   Así mesmo, a semana pasada iniciáronse as obras de mellora da Travesía de Belan e da Rúa do Colexio que comunica a estrada Sober-Gundivós coa estrada Sober-Monforte. Estes traballos contan cun orzamento superior aos 80.000 euros e son financiados pola Axencia Galega de Infraestruturas da Xunta de Galicia.   Con algo mais de 50.000 euros de fondos propios municipais están acometéndose tamén traballos en O Campo , O Pacio, A Torre e Sante de Abaixo en Bulso e A Carboeira en Gundivós e van continuar en A Boca (San Martiño de Anllo), A Pena de Gundivós, Hortás en Anllo San Estevo, Sanmil en Santa Cruz de Brosmos, A Igrexa en Bolmente, Moreda en Vilaescura, A Lampaza en Doade. Tamén se renovará con aglomerado o camiño dende O Barrio a Suairexa en Figueiroá.   A Consellería do Medio Rural, ademais, vai sacar a licitación dentro do Plan de Infraestruturas Rurais os traballos de aglomerado da primeira fase da estrada que vai dende Vilanova en Gundivós ata O Ventorrillo en Neiras con 60.000 euros de presuposto.   Por último, a Deputacion Provincial de Lugo ven de levar a cabo melloras de rexeneración por mais de 25.000 euros na estrada dende As Gandaras a Sampil en Pinol.   Accesos a viñedos O alcalde de Sober, Luis Fernández Guitián, puxo en valor todas estas actuacións “que teñen como obxectivo mellorar o día a día dos nosos veciños e veciñas”. Destacou ademais que benefician “á práctica totalidade das parroquias do concello”. O rexedor tamén avanzou que nos próximos días se van a acometer melloras en accesos a viñedos nas Ribeiras do Sil e Cabe con 25.000 euros de fondos propios.